Харалдьыктан иэйиилэр

Н.Михалева-Сайа тыла 

Эрдэтээҥи харалдьыктыы
Эн куйааскын ылынан,
Ырыа буолан, таптал буолан
Тыллыбытым, тыыммытым...
Ол саас этэ дьикти күүрүү
Үөйбэтэхтэн көтөҕүллүү,
Бу олохтон дьолу сүүйүү
Үөрүүтүнэн үлүһүйүү!

Хос ырыата:

Тыллыы тырым тыынынан
Тыҥыы тыкпыт ол сырдык,
Үөрүү үрдүк кустугун
Өрүү уунуох курдугуҥ!

Сибигинээн кэпсэтэр
Сибэккилэр буоланнар
Сиппиттэрэ кистэлэҥ
Сир симэҕэ киэһэлэр,
Кэтэһииттэн киэркэйэр
Кэм кэрчигэ буоланнар
Кэлбиттэрэ кэбирэх
Кэрэчээнэ түгэннэр...

Хос ырыата.

Эрдэтээҥи харалдьыктыы
Эн куйааскын ылынан,
Ырыа буолан, таптал буолан
Тыллыбытым, тыыммытым...
Ол саҕана киэҥ да халлаан
Былыттары билиммэтэ,
Ол чаҕылхай сааскы халлаан
Мин олоҕум, кэмим этэ!

Хос ырыата.

Послушать/Cкачать эту песню

Mp3 320kbps на стороннем сайте